கமல்ஹாசன் உள்பட திமுக ராஜ்யசபா எம்பிக்கள் யார் யார்? வைகோ மீண்டும் எம்பி ஆவாரா?

ராஜ்யசபா தேர்தல் விரைவில் நடைபெறவுள்ள நிலையில், திமுக தரப்பில் யாரெல்லாம் எம்.பி. பதவிக்கு தேர்வாகலாம் என்பதற்கான ஆர்வமான விவாதம் உருவாகியுள்ளது.

முந்தைய மக்களவை தேர்தல் கூட்டணி அடிப்படையில், மக்கள் நீதி மய்யத்திற்கு ஒரு இடம் ஒதுக்கப்படும் என்பது உறுதி செய்யப்பட்டுள்ளதாக தெரிகிறது. எனவே கமல்ஹாசன் ராஜ்யசபா எம்பி ஆவது கிட்டத்தட்ட உறுதி செய்யப்பட்டுள்ளது.

மீதமுள்ள மூன்று இடங்கள் திமுகவுக்கே உடையதாக இருக்கும். இதில் முன்னாள் எம்.பி. முகமது அப்துல்லா மீண்டும் தேர்வாகலாம் எனவும், உச்சநீதிமன்றத்தில் தமிழக அரசின் வழக்குகளை திறமையாக நடத்தி வரும் பி. வில்சனுக்கு மீண்டும் வாய்ப்பு கிடைக்கும் எனவும் கூறப்படுகிறது. அவரை முதல்வர் மு.க.ஸ்டாலின் பலமுறை பாராட்டியுள்ளார்.

இதே நேரத்தில், கடைசி இடத்துக்கான போட்டி தீவிரமாக இருக்கும் என கூறப்படுகிறது. இது திமுகவில் இருந்து புதிய முகத்துக்கு வழங்கப்படுமா அல்லது மதிமுகவின் வைகோவுக்கு கொடுக்கப்படுமா என்ற எதிர்பார்ப்பு நிலவுகிறது.

மொத்தமாக, திமுக தரப்பில் இம்முறை ராஜ்யசபா இடங்கள் எவருக்கு வழங்கப்படுகின்றன என்பது, அரசியல் வட்டாரங்களில் மிகுந்த கவனத்தையும் எதிர்பார்ப்பையும் உருவாக்கியுள்ளது.

Edited by Mahendran