ஆபரேஷன் சிந்தூர் இன்னும் முடியவில்லை: கண்காணிப்பு தொடர்கிறது: இந்திய ராணுவம்..!

ஆபரேஷன் சிந்தூர்’ என்ற குறியீட்டுப் பெயரில் இந்தியா, பாகிஸ்தானின் தூண்டுதல்களுக்குப் பதிலடி அளிக்கும் நடவடிக்கையை ஆரம்பித்துள்ளது. ஜம்மு மற்றும் காஷ்மீர் பகுதிகளில் பயங்கரவாத நடவடிக்கைகள் அதிகரித்ததைத் தொடர்ந்து, எல்லை பாதுகாப்புப் படையினர்   பதிலடிகளை அளித்து வருகின்றனர்.

இந்நிலையில் பிஎஸ்எஃப் ஜம்மு மண்டல ஐ.ஜி. சசாங்க் ஆனந்த் தெரிவித்ததாவது, “பாகிஸ்தான் மீதான நம்பிக்கையின்மை காரணமாக இந்தச் செயல்பாடு மேற்கொள்ளப்பட்டது. எல்லைப் பகுதிகளில் முழு கண்காணிப்பு மற்றும் பாதுகாப்பு ஏற்பாடுகள் தொடர்கின்றன” என்றார். பெண்கள் உள்பட பலர், எல்லை பாதுகாப்பில் உறுதியாக நின்று பணியாற்றுவது குறிப்பிடத்தக்கது.

சம்பா பகுதியிலுள்ள சாவடிகளுக்கு வீரமரணமடைந்த வீரர்களின் பெயர்கள் சூட்டப்பட உள்ளன. கடந்த சில நாட்களில் 40க்கும் மேற்பட்ட பயங்கரவாதிகள் ஊடுருவ முயற்சித்த போதிலும், இந்திய வீரர்கள் அதை தடுத்துள்ளனர். பாகிஸ்தானின் பல முகாம்கள் மற்றும் எல்லைச் சாவடிகள் இந்திய அதிரடி தாக்குதலால் சேதமடைந்துள்ளன.

இந்தியாவின் தாக்குதலால் பாகிஸ்தான் மீண்டும் சண்டை நிறுத்த ஒப்பந்தத்தை பின்பற்ற வேண்டிய சூழ்நிலையில் தள்ளப்பட்டுள்ளது. விவசாயிகள் தங்கள் பணிகளைத் தொடரத் தேவையான பாதுகாப்பு அளிக்கப்படும் என்றும், எல்லை பகுதி மக்களின் நம்பிக்கையை நிலைநாட்டும் முயற்சிகள் மேற்கொள்ளப்படும் என்றும் அதிகாரிகள் தெரிவித்துள்ளனர்.

Edited by Mahendran